TUNI LHAGAO AN
Mihemin an neh a twi donna ana toh chunga nopsah na anei sanga thilpha jo ding imacha aumpoi.Hiche ahitheina ding jong hi Pathen khutna kon ma ahi (Eccl/Thuhilpa 2:24).
Amasa penin niso seh in ivai konun,ipi bolleng minung kapha dem! Iti kiman chah leng nomin hinkho kamang dem tihi mihem lunggel thei jouse in aboipi khat chu ahie ti igeldoh masau vin ahi.Hibang se lom lomma ikiseh na ho hin nomsa na tah tah eipeh nah em tijong gah nung vet leuhen ihin dan cheh in iki muthei uve.““Tujing kah Thuhil pa a imu bangun tohna chunga nopsah na kiti hi Pathen khutna um ahidan eisei peh un ahi.Mihem tha le jung, hetna tincheng podoh in kithoh jong leuhen Pathen panna louvah nopsah na chamkim aum poi.Nopsah na in ahop hi amimal ding hilouvin, insung ule nao, sopi cheng kikah a nom taha hing khoma, lam pi jousea phatthei na chang pumma ikhosah khom pahi aseina ahin, nangam changa nom nasah nachun nopsah na bukim nape joupoi tijong aki langin ahi.Pathen lunglhai na chang miten ain chen khosah na hihen lang, neile gou, dam theina chule engbol na atoh pon ahi.Hijeh chun tuni jing kah hin ulsa longa lungthim le tha ipatnau ho hi Pathen jalla nopsah na chang te ihi theina dingun panla thah kit din Pathenin eidei sah uve.Athu theng ibon chaova din Pathenin phatthei eiboh peh taohen.
TUNI TAONA
Hingjing kapau Pathen, tunia katoh gim na houhin nangma jalla nopsah na eipeh uva, kanop sah na hou va konna nangma kasuh mil louna dingun nathu in nei houpi soh kei uvo ti in Jesu minin katao uve Amen
TUNI LHAGAO AN
Nathu hettoh sah ho kahet theina din Nalhacha keihi het themna neipen! (Psalms 119:125)
Pathen thu hettoh sah na dinga hin keima ngaito in mihem khat thahat na le chihna,haona in ajo joudin katahsan pon ahi.Pathen thilpeh chihna hi amang them loudin lamvaina joh ahi in,amang them te din athu hettoh sahna dinga manlutah ahi.““Nitin ihinkho a hi itilampia Pathen thu ihettoh sah em ti ikikhol din Pathenin tujing kah in eihoupi e.David nin Pathen komma athu hettoh sah ahetthei na dinga atao bangin eihon jong iti chonleng Pathen lhacha/cha ihina a athu hettoh sah hina dinga ichon jou ding ham tihi itaonau hisah jing din iki temun ahi.Leichihna le thepna pang louva,leiset na mimol penin jong amu thei Pathen thu hettoh sahna dinga vanlam chihna nei Pathen lhacha hithei cheh din athu theng Pathenin phatthei eiboh peh taohen Amen.
TUNI TAONA
Pakai Pathen,keiho chihna lhing joulou nanga kon mong monga chihna,nathu hettoh sahna dingin nachate tujing kah hin neihin buh lhah peh unlang,kachonnau hin namin loupi sah joudin neipan piuvo ti in Jesu Christa minin kataove Amen
- Nu Phalbem Singsit
